የመደመር ፍልስፍና በተግባር፦ አዲስ አበባ ዜጎቿ...

May 20, 2026 - ውስጥ Current Affairs    0

የመደመር ፍልስፍና በተግባር፦ አዲስ አበባ ዜጎቿን የምትመግብበት ጥበብ እና የመደመር ምስጢር

የአንድን ሥርዓተ መንግሥት ሥልጣኔ ከሚመዝኑ መሠረታዊ መስፈርቶች መካከል ዋነኛው አቅም የሌላቸውን ዜጎች የሚይዝበት መንገድ መሆኑ ይታወቃል።

ከተሞችን ከህንጻዎች ክምችትነት ባለፈ የሰው ልጅ ክብር የሚጠበቅባቸው ማኅበራዊ ተቋማት ለማድረግ በአሁኑ ወቅት በአዲስ አበባ ከተማ እየተስፋፋ የመጣው “ዜጎቿን የምትመግብ ከተማ” ንቅናቄ እና የምገባ ማዕከላት መረብ፣ ከተማዋን ከነዋሪዎቿ መሠረታዊ ፍላጎት ጋር የማገናኘት ትልቅ ስትራቴጂካዊ እርምጃ ሆኗል።

ይህ ዝቅተኛ ገቢ ያላቸውን፣ አቅመ ደካሞችንና የጎዳና ተዳዳሪዎችን በቀን ቢያንስ አንድ ጊዜ በነፃ የመመገብ፣ እንዲሁም መንቀሳቀስ ለማይችሉ አረጋውያንና ሕሙማን “እስከ ቤት ድረስ” ምግብ የማድረስ ሥርዓት፣ የኢትዮጵያን ማኅበራዊ እሴት የቃኘና ወቅታዊውን የመደመር ፍልስፍና መዋቅራዊ መሠረት ያደረገ የመንግሥት ቁርጠኝነት ማሳያ ነው።

ጥንታዊው የማዕድ ማጋራት ባህላችን ሥርዓታዊና ተቋማዊ ባለመሆኑ ቀደም ሲል ክፍተቶች የነበሩበት ቢሆንም፣ አሁን ላይ ግን ባህሉ ከዘመናዊ የአቅርቦት ሰንሰለት ጋር ተጋጥሞ ወደ መዋቅራዊ የመንግሥት ኃላፊነት ተሸጋግሯል።

የመደመር ፍልስፍና የሚያራምደው የሰው ተኮር ልማት መርህ፣ የአንድ ከተማ ዕድገት በፎቆች ቁመት ብቻ ሳይሆን በዜጎቿ የኑሮ ጥራትና ሰብአዊ ክብር እንደሚለካ ያስተምራል።

ይህም ከተማዋን በኮሪደር ልማት የማስዋብ እና የሰውን ልጅ የመኖር ዋስትና ጎን ለጎን የማስኬድ ትልቅ ሚዛን የፈጠረ ሲሆን፣ በዓለም አቀፍ ደረጃ በከተማ ሶሺዮሎጂ ዙሪያ የሚመራመሩ እንደ ዴቪድ ሃርቪ ያሉ ምሁራን የሚያነሱትን የከተማ መብት እና ማኅበራዊ ፍትሕን በተግባር ያረጋገጠ ክስተት ሆኗል።

የምገባ ማዕከላቱ የምግብ ማደያ ብቻ ሳይሆኑ፣ የተገለሉ የኅብረተሰብ ክፍሎች እርስ በርሳቸው የሚገናኙባቸው የማኅበራዊ መስተጋብር መድረኮች በመሆን የከተማዋን ማኅበራዊ መዋቅር እያጠናከሩት ይገኛሉ።

የከተማ አስተዳደሩ ያዋቀረው የመደመር መንግሥት ረሃብንና የምግብ ዋስትና ማጣትን እንደ ሰብአዊ መብት መግፈፍ በመረዳቱ፣ ዜጎች በቀን ቢያንስ አንድ ጊዜ እንዲመገቡ በማድረግ ሰዋዊ አቅማቸውን እየገነባ ይገኛል።

ይህ መርሃ-ግብር አነስተኛ ገቢ ያላቸው ነዋሪዎች ከምግብ ወጪ የሚተርፋቸውን ገንዘብ ለቤት ኪራይ፣ ለጤና እና ለልጆች ትምህርት እንዲያውሉ በማድረግ የድህነት ዑደቱን ለመስበር ትልቅ እገዛ እያደረገ ነው።

ከፍተኛ በጀትና ጥብቅ የጥራት ቁጥጥር የሚጠይቀውን ይህንን ግዙፍ ፕሮጀክት በዘላቂነት ለመምራት ከውጭ እርዳታ መጠበቅ ይልቅ የሀገር ውስጥ ባለሀብቶችንና በጎ ፈቃደኞችን በማስተባበር ራስን የመቻል መንፈስ የተገነባ ሲሆን፣ ከከተማ ግብርና የሚመጡ ምርቶችን በቀጥታ ከማዕከላቱ ጋር በማገናኘት የዋጋ ንረቱን መቋቋም ተችሏል።

ይህ ንቅናቄ ከተማዋን ውብና ዘመናዊ ከማድረግ ጎን ለጎን ዜጎች በሰብአዊ ክብራቸው ልቀው የሚገኙባት ጠንካራ ማኅበራዊ መሠረት እያስቀመጠ መሆኑ ታውቋል።

---

Comments

ምንም አልተገኘም.